U nda nga jeta më 24.8.2026 në Tiranë, ish-i dënuari politik, Shpëtim Ramazan Stërmasi, i cili vuajti 14 vjet, 3 muaj dhe 16 ditë heqje lirie në vitet 1976-1991. I ndjeri u lind në Tiranë më 12.3.1949. Kishte pasur edhe babanë të dënuar politik. Në dy vendimet e dënimit të tij në vitet 1977 dhe 1980 thuhen të dhëna kontradiktore për arsimin. Në dënimin e parë thuhej se kish mbaruar arsimin 7-vjeçar dhe ishte me profesion axhustator. Në dënimin e dytë, thuhej se kish mbaruar 11 klasë dhe ishte elektricist. Pas vitit 1992, Stërmasi punoi në strukturat e Policisë si shef i komisariatit në Elbasan, në Mat, me Forcat e Ndërhyrjes së Shpejtë, etj..
Dënimi i parë
U arrestua më 25.9.1976, në moshën 27-vjeçare. U akuzua në bazë të nenit 73/1 të Kodit Penal të vitit 1958, në kombinim me nenin 12, d.m.th. për agjitacion e propagandë. U përfshi në një proces së bashku me shtetasit: Fatos Kërluku, Petrit Alushi, Arian Gjergji, Bektash Satko. Për të gjithë theksohej se, në bashkëpunim me njëri-tjetrit, kishin bërë agjitacion e propagandë kundër pushtetit popullor.
Gjykata e Rrethit Tiranë, e drejtuar nga Jani Vasili, me pjesëmarrjen e prokurores Afroviti Gjebero, me vendimin nr.51, datë 8.2.1977, e deklaroi fajtor dhe e dënoi me 9 vjet heqje lirie. U la në fuqi me vendimin nr.64, datë 28.2.1977 të Kolegjit Penal të Gjykatës së Lartë.
Dënimi i dytë, ridënimi në Spaç
U arrestua më 21.7.1980, duke vuajtur dënimin në Repartin nr.303 Spaç. U akuzuan në bazë të nenit 55/1 në kombinim me nenin 13 të Kodit Penal të vitit 1977, për agjitacion e propagandë. U përfshi në një proces së bashku me të dënuarit: Gjokë Margjoni, Nikollë Frroku, Ferit Tahja, Gëzim Medolli, Enver Mustafaraj, Bardhyl Çitozi.
Midis të tjerash, në vendim thuhej: “Gjatë kohës së vuajtjes së dënimit, këta të pandehur nuk e kanë ndërprerë aktivitetin e tyre armiqësor kundër partisë e pushtetit tonë popullor, përkundrazi, e kanë thelluar më shumë. Ata kanë agjituar e propaganduar kundër vijës politike marksiste-leniniste që ndjek PPSH për ndërtimin socialist të vendit, udhëheqjes së partisë, luftës që zhvillon partia kundër armiqve të brendshëm e të jashtëm dhe masave me karakter politik dhe ekonomik të marra prej saj për ndërtimin socialist në vendin tonë duke synuar të dobësojnë dhe minojnë shtetin e diktaturës së proletariatit në vendin”.
Deri ditën e ridënimit kishte vuajtur 3 vjet, 10 muaj e 27 ditë. Me punë kishte fituar 2 muaj e 5 ditë. I mbeteshin edhe 4 vjet, 10 muaj dhe 28 ditë heqje lirie. Midis të tjerash, në vendim thuhej: “Edhe i pandehuri Shpëtim Stërmasi, megjithëse i dënuar një herë për krimin e agjitacionit e propagandës, të cilin e vuan në Repartin nr.303 Spaç, nuk e ka ndërprerë veprimtarinë e tij armiqësore për dobësimin e minimin e pushtetit popullor”.
Procesi gjyqësor u zhvillua në Repartin nr.303 Spaç. Dolën 22 dëshmitarë, prej të cilëve vetëm një nënoficer.
Gjykata Popullore e Rrethit Mirditë, e drejtuar nga Mihal Kazanxhi, me pjesëmarrjen e prokurorit Vaskë Dimoshi, me vendimin nr.39, datë 11.9.1980, e deklaroi dhe e dënoi me 10 vjet heqje lirie. Në bashkim të dënimeve, u dënua me 14 vjet heqje lirie. U lirua më 10.1.1991 nga Reparti nr.305 Përparim, me dekretin nr.7444, datë 5.1.1991 të Presidiumit të Kuvendit Popullor
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.