Pushkatuam Ahmet Zenelin, për të kërcënuar fshatin të dorëzojë armët

0
248

Dokumenti i vitit 1946, tregon sa të lehtë e kishin forcat e ndjekjes të pushkatonin malësorët e Veriut që i bënin rezistencë vendosjes së pushtetit të tyre dhe e quanin të justifikuar marrjen e një jete, nëse prej vrasjes arrinin të grumbullonin ca pushkë dhe çifte

“Kemi pushkatuar Ahmet Zenelin me 5 tetor 1946, në Kullaj Bokes, për të kërcënuar fshatin që të dorëzojë armët dhe fshatarët vërtet pas kësaj dorëzuan 7 pushkë”.

Për komunistët jeta e malësorëve të Veriut që nuk e pranonin doktrinën e tyre, kaq vlente. Madje mund t’i pushkatonin edhe për më pak.

Ngjarja i takon vjeshtës së 1946-ës, kur brigadat partizane, edhe pse kishte përfunduar lufta, luftonin me armë në shtëpitë e tyre, shqiptarët e pafajshëm që nuk e pranonin komunizmin si filozofi jete.

Për t’i nënshtruar, ata hynë me forca të armatosura fshat më fshat e shkelën malet pëllëmbë për pëllëmbë, duke ndjekur këmba-këmbës kundërshtarët e tyre politikë të arratisur. Aksioni i gjerë u shtri sidomos në malësitë e Shkodrës, Pukës, Kukësit e Tropojës, Mirditës, Matit e Dibrës.

Dokumenti që publikojmë sot në Kujto.al, sjell pikërisht shembullin makabër të veprimeve vëllavrasëse të komunistëve në Veri.

Dokumenti i plotë, si në vijim:

Vdekje Fashizmit

Liri Popullit

Ushtrija Kombëtare Shqiptare

Divizjoni i Mbrojtjes së popullit

Komanda e qarkut M.P.

Shkodër

Nr.B5-77/276 Res

Shkodër më 6/X/1946.

Komandës Divizjonit M.Popullit

Tiranë

E për njoftim

Seksionit të Sigurimit të Shtetit M.P.

Ketu.

Ju njoftojmë se me datën 5/Tetor në katundin Kullaj Bokes, Njisiti nr.15 pse nuk ka mund të nxjerrë pushkët nga katundarët e atjeshëm ka pushkatuar të quajturin Ahmet Zenelin po nga ky katund. Mbas pushkatimit të këtij aty kanë dalë me njiherë 7 pushkë, 3 çifte dhe kanë deklaruar se kanë patur edhe të tjera, të cilat duhet të jenë dorëzuar ma vonë.

Kaqe per dijeni.

Komisari Politik

Maman Saliu

(Firma)

Komandanti i qarkut M.P

Major

Musa Daci

Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.

PËRGJIGJU

Please enter your comment!
Please enter your name here