Lufta kundër njerëzve të fesë nuk nisi pas vendosjes së pushtetit komunist, por shenjat se do ishin “preh e përzgjedhur” e diktaturës u dukën edhe gjatë kohës së luftës. Një pjesë e çetave partizane, “bëhej” gjyqtar, prokuror dhe ekzekutues. Ndër viktimat e para ishin edhe përfaqësues të klerit të të gjithë besimeve në Shqipëri. E tillë ishte edhe historia e imamit Seit Idriz Shehu, nga fshati Vrajtë i Peshkopisë. Ndërsa kuptonte se gjithnjë e më shumë po i afrohej një rrezik i madh vendit, imam Shehu nisi të propagandonte ndër besimtarë dhe banorë të fshatrave për të keqen e sistemit komunist.
U tregonte dhe kërkonte fshatarëve që të mos përkrahnin komunistët, pasi do të vinte koha kur do u merrnin tokat, tu mohonin lirinë, besimin dhe çdo të drejtë tjetër, ashtu siç kishte ndodhur në Bashkimin Sovjetik. Kjo e vërtetë e fjalëve të imamit nuk u prit mirë nga forcat partizane. Më 26 gusht 1944, arrestohet dhunshëm ndërsa ishte në xhami dhe i bëhet një gjyq formal dhe jeta e tij do të mbyllej vetëm pak orë pasi e arrestuan.
Gjykohet për “agjitacion e propagandë” kundër Frontit Nacional-Çlirimtar nga një gjykatë partizane e Brigadës V, me komandant Shefqet Peçin. Vendoset të ekzekutohet me pushkatim dhe mënjëherë një togë rreshtohet dhe derdh disa plumba në trupin e imamit. Brigada e V me komandant Shefqet Peçin do të vijonte me të tjera gjyqe formale dhe krime të rënda gjatë kohës së luftës.
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.