16 qershori, përkujtohet në Shkodër dita e të vrarëve në kufi nga regjimi komunist

0
507
blank

Në Shkodër, më 16 qershor u përkujtua demonstrata e 29 viteve më parë, e cila mori shkas nga vrasja në kufi e 17 vjeçarit Pëllumb Pëllumbi. Kjo datë përkujton gjithë të vrarët në kufi gjatë vitit 1990.

Ish-të përndjekur politikë dhe pjesëtarë të Shoqatës së të Vrarëve në Kufi përkujtuan demonstratën e 16 qershorit të vitit 1990 në qytetin e Shkodrës, e cila mori shkas nga vrasja në kufi e 17 vjeçarit Pëllumb Pëllumbi, martir i demokracisë pas vdekjes. Kjo është edhe dita përkujtimore e të vrarëve në kufij nga regjimi komunist. 29 vite më parë, disa qindra të rinj shkodranë përcollën me thirrje kundër regjimit, trupin e pajetë të 17 vjeçarit, Pëllumb Pëllumbi, i vrarë pranë postës kufitare të Hanit të Hotit në Malësi të Madhe, në përpjekje për t’u arratisur.

blank
Filip Guraziu

Filip Guraziu nga Shoqata e Ish-të Burgosurve Politikë tha: “Ishte spontane prej të rinjve, prej shokëve, familjarëve e qytetarëve që ishin komplet të zhgënjyer për këtë tradhëti të madhe që komunistët në pushtet po u bënin atyre që donin të kalonin kufirin. Në këtë kohë, kalimi i kufirit nuk ishte më krim kundër atdheut dhe kjo u bë shkak  që në tërë Shqipërinë njerëzit të tentonin të kalonin. Atëherë terrori komunist që ishte gjallë akoma, kishte instiktin e vet  të vrasjes dhe vrau 63 vetë.” E pranishme në këtë ceremoni, Mri Kola, nëna e Pëllumb Pëllumbit kujton ditën kur në gjykatën e Shkodrës, u përball me ushtarin që i kishte vrarë të birin.

blank
Mri Kola

Mri Kola, nëna e Pëllumb Pëllumbit tha: “Kam pasur vetëm vetëm atë djalë. U nis me ik në Jugosllavi si tërë shokët e tij, mbeti në kufi... se kush e bëri atë tragjedi n'zemër  teme s'e di. Di vetëm se një ushtar ka qenë në gjyq atë ditë, mbas një muaji, edhe më tha “Nënë e Pëllumbit, vetëm kam pas urdhër që kë të zini në kufi mos e leni me kaluar, nuk thash me vra, vetëm mos leni dikë me kaluar. Vetë jam ai që të ka lënë pa djalë.” Ishim aty në gjykatë. S'kisha ça me thënë tjetër, kishte shkuar djali, s'mundet me ma ngjall as ai. Edhe ai ishte në ato presjonet e tij të vështira”.

Drejtuesi i shoqatës “16 qershori”, Bep Kolombi thotë se kjo datë është një homazh për të gjithë ata të rinj e të reja që u vranë barbarisht në kufi në përpjekje për të shpëtuar nga regjimi komunist i kohës.

Drejtuesi i shoqatës “16 Qershori” thotë: “Nuk është vetëm thjesht demostrata e 16 qeshorit  dhe përkujtimi i Pëllumb Pllumbit, është përkujtim për të gjithë të vrarët në kufij jo vetëm në rrethin e Shkodrës, por në të gjithë Shqipërinë dhe e dyta, është dhe një përkujtim për ato nëna  dhe prindër që nuk i kanë gjetur akoma eshtrat e fëmjëve të tyre”.

Zoti Kolombi tha se, megjithëse kanë kaluar 29 vite nga rënia e komunizmit, ende nuk janë gjetur trupat e shumë prej të vrarëve në kufij gjatë vitit 1990, ndaj, shtoi ai, në bashkëpunim me Institutin e Studimeve të Krimeve të Komunizmit po bëhen përpjekje për gjetjen e eshtrave të tyre.

Vrasje fëmijësh në diktaturë/ 16-vjeçari i ekzekutuar në kufi në vitin 1990

Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.

PËRGJIGJU

Please enter your comment!
Please enter your name here