Një balerinë "armike" në Teatrin e Operas e Baletit

0
532
blank

Dosja e Sigurimit të Shtetit për artistët e TOB, kërcimtarja bijë e babait të  pushkatuar nga regjimi si dhe violinisti shkodran, bir i babait të burgosur e xhaxhait të pushkatuar

Artisti shkodran me inicialet B.G, ishte në listën e Sigurimit të Shtetit për t'u survejuar, i dyshuar se kishte bërë propagandë kundër regjimit komunist. Prejardhja e tij politike ishte një sinjal i rëndësishëm për hetuesit dhe bashkëpunëtorët e Sigurimit të Shtetit, për të gjetur te ky violinist shenjat e agjitacionit dhe propagandës kundër regjimit. Kështu, në listën e hartuar nga bashkëpunëtorët e Sigurimit pas ngjarjes së dëmtimit të fotografisë së diktatorit Enver Hoxha, ishte padyshim B.G, si biri i një babai të burgosur nga regjimi komunist, si pjesë e shtresës së tregtarëve si dhe nip i një xhaxhai të pushkatuar nga regjimi komunist, si kundërshtar i këtij regjimi.

Siç e shohim edhe në informacionet që bashkëpunëtorët e Sigurimit kanë renditur në dosjen e tij, B.G. kishte studiuar në Itali për muzikë, violinë. Në rrethin e tij shoqëror ishte shprehur shpesh për jetën artistike që zhvillohej në Itali e në Perëndim duke e krahasuar me jetën e varfër artistike që zhvillohet në Shqipërinë komuniste. Pa dyshim që çdo fjalë e thënë prej tij do të interpretohej se vepër armiqësore kundër pushtetit popullor.

Më poshtë do të sjellim një paragraf që përmbledh gjetjet e bashkëpunëtorëve të Sigurimit për violinistin shkodran i cili ishte shpallur armik i popullit.

Dosja

blank

B.G i datëlindjes 1923 lindur në Shkodër me arsim të lartë në profesion violinist me banim në Tiranë.

Gjatë kohës së Zogut dhe okupacionit si ky dhe familja e tij kanë qenë pro atij regjimi. I ati ka qenë në shtresën e pasur dhe merrej me shkëmbimin e arit. Gjatë okupacionit B ka qënë për studime në Itali dhe fashizmi e ka quajtur shpëtimtarin e Shqipërisë.

Mbas çlirimit i ati u dënua për kontrabandë ari. Xhaxhai i tij është pushkatuar.

Mbahet nën kontroll të organeve tona sepse dyshohet për agjitacion e propagandë.

Kohët e fundit kanë dalë materiale se ky zhvillonte agjitacion dhe propagandë duke folur se tek ne s'ka art e operat tona s’vlejne asgjë, se gjendja ekonomike tek ne eshtë shumë e keqe. Mburr jetën në Itali, thotë se Beqir Balluku kishte logjikë strategjike etj..

Jemi të mendimit që ky të hiqet nga ky institucion dhe ne do të vazhdojmë kontrollin e tij për të zbuluar veprimtarinë e tij armiqsore”, shkruhet në dosjen e Sigurimit të Shtetit.

***

Në të njëjtën dosje do të gjejmë edhe të dhënat për një tjetër artiste të survejuar. Ishte një balerinë në teatrin e operas dhe baletit. Vajza balerinë ishte bija e një babai të pushkatuar si armik i popullit nga regjimi komunist. Në të dhënat që gjejmë në dosje do të vërejmë se balerina është kategorizuar si njeri me qëndrim të keq politik, nisur nga e shkuara e familjes së saj, babai i pushkatuar.

Dosja

G.F.T e datëlindjes 1942, lindur në Dibër, me kombësi e shtetësi shqiptare, me arsim të mesëm, me profesion kërcimtare, me punë në teatrin e operas, me banim në lagjen nr3 Tiranë.

Rrjedh nga një shtresë e pasur tregtarësh. Si familje, gjatë kohës së Zogut dhe okupacionit kanë përkrahur ato regjime. I ati i saj ekzekutuar si kriminel lufte. Është me qëndrim të keq politik. Jemi të mendimit të hiqet nga opera dhe nga Tirana.

blank

Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.

PËRGJIGJU

Please enter your comment!
Please enter your name here