Me qarkoren nr.188, datë 31.1.1946 të Ministrisë së Punëve të Brendshme (përgatitur nga Drejtoria e Policisë), nënshkruar nga ministri Haxhi Lleshi, duke qenë se shumë libra binin në “kundërshtim flagrant me parimet demokratike të sistemit tonë qeverisës”, urdhëroheshin seksionet e punëve të brendshme të komiteteve ekzekutive të prefekturave të bënin kontrolle të imëta dhe, pasi të mbanin dy ekzemplarë, të digjnin gjithë librat e listës së shënuar. Lista përmbante 395 tituj. Shumica të huaj, italianë kryesisht, një pjesë propagandistikë, por mes tyre gjendeshin edhe tituj të autorëve apo institucioneve shqiptare. Binin në sy ndalimet e librave për çështje kombëtare e që nuk kishin asnjë element politik.
Pjesë nga lista e librave të ndaluar:
-“Lumnija e Perëndisë dhe koha e vjet”
-Ministria e Arsimit, “Gjeografia e klasës 5 fillore”
-Mehdi Frashëri, “Probleme shqiptare”
-Hamit Kokalari, “Kosova djep i shqiptarizmit”
-Samim Visoka, “Nana Kosovë”
-Mitrush Kuteli, “Sulme e lot”
-Shefqet Kamenica, “Dashuria për atdhe”
-Nebil Çika (nuk shkruhet në dokument emri), “Njimendësia shqiptare”
-Petro Harizi, “Triumfi i Legalitetit”
-A. Domini, “Konferenca patriotike”
-Koço Semini “Shqiptari zot në shtëpinë e vet”
-Nikolla Ivanaj “Historia e Shqipërisë së re”
-Besim Qorri, “Shqipnija e vërtetë”
-Revista “Leka”, “Të drejtat e Shqipërisë etnike”
-Piro Floqi “Çamëria dhe Dibra”
-Piro Floqi “Kosova e lirë”
-Piro Floqi, “Bajram Curri”
-Komisioni i 25-vjetorit, “Konkurs për himnin e flamurit”
-Milto S.Gurra “Themelet e patriotizmës shqiptare”
-Rosolino Petrota, “Arbëreshët në Itali”
-Chlementius, “Shqipëria e vërtetë”
-Jusuf Luzaj, “Rrëfimet”
-Stavro Frashëri, “Përmes Mirditë në Dibër”
-Asim Lohja, “Për mbrojtje të Ulqinit”
-Teki Selenica, “Shqipëria më 1927”, dy volume
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.