Biznesmeni i madh Lluka Rashkoviç erdhi në Shqipëri si përfaqësues i kompanisë së udhëtimit “SAKT” dhe përfundoi i pushkatuar pa gjyq për hedhjen e bombës në Ambasadën Sovjetike. Komunistët kishin vrarë në vitin 1944 edhe ortakun e tij nga Durrësi, Lluka Xhumarin.
Në kohën e mbretërisë Lluka Rashkoviç shpërngulet nga Mali i Zi dhe vendoset në Shqipëri, në nisje të një biznesi të ri për kohën, në kompaninë e makinave dhe autobuzëve që ofronin udhëtime brenda vendit. Për mbarëvajtjen e biznesit lidhet me tregtarin e njohur Durrsak Lluka Xhumarin, duke krijuar kompaninë “SAKT”, nga ku kryhej transporti i udhëtareve si në Shqipëri ashtu edhe në Ballkan. Ardhja e komunistëve në pushtet do niste fundin e një epoke të nisur. Më 1944 arrestohet nga komunistët Lluka Xhumari dhe ekzekutohet prej tyre. Ndërsa ortaku i tij malazezi Rashkoviç qëndroi në hije, me shpresën se situata do të ndryshonte. Por vitet e pritjes për “qetësimin e gjendjes” ishin vetëm fundi i tij, që më pas vijoi me persekutimin edhe të familjes. Më 20 shkurt 1951, Lluka Rashkoviç arrestohet, si i dyshuar për implikimin në hedhjen e bombës në Ambasadën Sovjetike në Tiranë. E gjithë pasuria e tij sekuestrohet më pas dhe në rastin e tij komunizmi “fitoi” dy herë. Fillimisht duke eleminuar një kundërshtar hipotetik, ndërsa e dyta jo pak e rëndësishme, ishte sekuestrimi i pasurisë së tregtarëve dhe biznesmenëve të medhenj, një prej të cilëve ishte Rashkoviç. Në hetuesi ai u torturua për disa orë radhazi bashkë me të tjerët, di i akuzuar si “tregtar dallaveraxhi dhe agjent që punonte për të huajt”. Në listën e 22 emrave që do të pushkatoheshin natën e 26 shkurtit 1951 ishte edhe Lluka Rashkoviç. Fati tragjik do vijontë për bashkëshorten dhe djalin e tij, të cilët u internuan dhe persekutuan përgjatë gjithë periudhës së sistemit totalitar.
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.