Kujtim Refat Pelaj, vuajti 31 vjet e 3 muaj heqje lirie. Hyri në burg në moshë 21 vjeçare dhe doli prej andej kur ishte 64 vjeç
Kjo është fotografia e fundit e jetës e të dënuarit politik Kujtim Refat Pelaj nga Vlora. Ai u dënua katër herë nga regjimi komunist dhe vuajti 31 vjet e 3 muaj heqje lirie. Fotografia e dhimbjes është publikuar nga studiuesi Kastriot Dervishi. Siç shkruan autori i publikimit, “Një portret që i ka të skalitura të gjitha. Hyri në burg në moshën 21 vjeçare dhe doli prej andej kur ishte 64 vjeç. Vdiq në azilin e pleqve në Fier. Në listimin tim, ai është numri 18 për nga vitet e burgut që ka kryer. Rrallë mund të gjesh në botë raste të tilla të një persekutimi të pashembullt dhe kriminal”.
Shenjat e diktaturës në fytyra viktimash, shfaqen ngjashëm edhe në portretin e të dënuarit politik Sako Murat Protoduari. Ishte arrestuar më 15 mars 1977 dhe për shkak të vuajtjeve e punës së rëndë, ndërroi jetë në Repartin nr.309 Ballsh. Ai u varros në Panahor, atje ku u varrosen dhjetëra të dënuar të tjerë që ndërruan jetë në burg, për shkak të urisë, torturave dhe punës së detyruar në rafinerinë e naftës në Ballsh. Pranë kësaj rafinerie nuk gjendet asnjë memorial në respekt të viktimave të diktaturës komuniste që humbën jetën në atë burg, në kushte çnjerëzore.
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.