Këtë viti, Zenel Peposhi do festojë 90-vjetorin e lindjes. Ka lindur më 20.3.1935 në Lusën të Kukësit. Me arsim të mesëm, me profesion gjeometër. Ky dy histori arratisjesh.
Së pari, u kthye në Shqipëri pas amnistisë së vitit 1956. E dërguan të punojë në ndërmarrjen komunale të Elbasanit. Ishte vetëm 24 vjeç kur e arrestuan më 8.9.1959. U akuzua në bazë të nenit 64 të Kodit Penal për tradhti ndaj atdheut. Siç deklaron edhe vetë, nuk njihte asnjë prej dëshmitarëve që iu paraqitën. Gjykata e bënte fajtor se nga viti 1954 ishte arratisur në Jugosllavi, pavarësisht se për këtë vepër ishte amnistuar. U akuzua edhe për letrat që iu gjetën në shtëpi. Gjykata Ushtarake Tiranë me veprim në Elbasan, me vendimin nr.4, datë 30.1.1960 e deklaroi fajtor dhe e dënoi me 25 vjet heqje lirie (prej të cilave 10 vjet duhet t’i vuante në regjim burgu), konfiskim të shtëpisë në Lusën, të një ore dore, heqjen e së drejtës zgjedhore për 5 vjet, pagimin 1104 lekëve për avokatin të caktuar nga gjykata dhe 2000 lekë shpenzime gjyqësore. U la në fuqi me vendimin nr.5, datë 24.2.1960 të Kolegjit Ushtarak të Gjykatës së Lartë. U lirua më 17.12.1978 nga Reparti nr.309 Ballsh kur ishte 43 vjeç.
Vuajti dënimet në këto kampe e burgje: Reparti nr.321 Burrel, Reparti nr.307 Rubik, Reparti nr.323 Fushë Krujë, Reparti nr.303 Elbasan, Reparti nr.309 Skrofotinë, Vlorë, Reparti nr.309 Ballsh.
Pas daljes nga burgu, më 30.5.1979 u internua në Vashanj të Peqinit. Duke përfituar se një makinë shkonte për një gjenerator në Kukës, udhëtoi bashkë me të. Pastaj e kishte të lehtë të arratisej nga Shqipëria. U integrua lehtë në jetën e re sepse njihte mirë anglishten, frëngjishten, serbokroatishten. Punoi dy vjet në një bankë në Paris. Më 1981 shkoi në Suedi dhe u vendos atje. Me aq sa i lejon mosha, është aktiv edhe në rrjetet sociale.
Fotoja realizuar rreth vitit 1965 në Repartin nr.307 Rubik
Në rast se keni dijeni mbi krime, viktima apo ngjarje që lidhen me periudhën e komunizmit në Shqipëri, klikoni këtu për ta publikuar në arkivën tonë.