Më 1960 Uran Kalakulla formoi në Tiranë një grup intelektualësh me synim krijimin klandestin të bërthamës të një partie socialdemokrate që do të shërbente si fokus i ndryshimeve politike që priteshin pas prishjes së marëdhënieve të regjimit komunist shqiptar me Bashkimin Sovjetik. Anëtarët e këtij grupi ishin Agim Musta, Riza Kuçi, Tanush Kaso dhe Kahreman Paftali. Në periudhën shtator-dhjetor 1960 grupi bëri disa mbledhje në shtëpira, në universitet, te shkolla e Kuqe dhe te parku i Tiranës. Me ndërmjetësinë e Tanush Kasos, u vendosën kontaktet me grupin e ngjashëm të krijuar ndërkohë nga Pjetër Arbnori në Durrës, duke synuar një bashkim të mundshëm të tyre. Në fund të shkurtit, 1961 organet e sigurimit të shtetit morën dijeni për ekzistencën e dy grupeve nëpërmjet Zeqir Koçit të grupit të Durrësit që përfshiu një kushëririn e tij, i cili që prej vitit 1958 ishte bashkëpunëtori i Sigurimit me emërin “Asistenti”. Ky i fundit i raportoi në organet e punëve të brendshme emrat e anëtarëve të grupeve të Durrësit dhe Tiranës të cilët u arrestuan me 27 maj 1961. Pas një hetuesie të gjatë me të gjitha presionet e mundshme, Gjykata Ushtarake e Tiranës, e përbërë nga kolonel Llazi Polena, nënkolonel Reshat Nepravishta, kapiten Xhavit Myrto, e ndihmuar nga prokurori major Sami Kapllani, i deklaroi fajtorë për tradhti ndaj atdheut e agjitacion, duke i dënuar me vendimin nr.113, datë 11.8.1962 Uran Kalakullën dhe Pjetër Arbnorin me vdekje me anë të pushkatimit ndërkohë që anëtarët e tjerë të dy grupeve u dënuan me afate të gjata burgimi. Me datë 3.9.1962. Presidiumi i Kuvendit Popullor, i ktheu vendimet me vdekje në me 25 vjet burgim.   Ka vuajtur në burgun e Burrelit.