| Ziso Vangjeli | |
|---|---|
 |
|
| Informacione Personale | |
| Emër/Mbiemër: | Ziso Vangjeli |
| Atësia: | Mihal |
| Vendlindja: | Miçan, Përmet |
| Datëlindja: | 8/8/1915 |
| Profesioni: | Doktor shkencash në Letërsi, poet |
| Gjyqi | |
| Data e Arrestimit: | 22/7/1968 |
| Akuza: | Tradhti ndaj atdheut dhe Agjitacion e propagandë |
| Dënimi: | 20 vjet Burg |
| Hetuesi: | Dhimitër Krisafi, Rustem Çipi |
| Vendimi: | nr.5 |
| Data e Vendimit: | 19/4/1969 |
| Gjykatësi: | Sokrat Dautaj |
| Gjykata: | Gjykata Popullore e Rrethit Përmet |
I lindur në Miçan të Përmetit. Ndoqi Liceun e Korçës. Më pas emigroi në SHBA te i ati, ku kreu studimet e larta në universitetin e Nju-Hempshajerit në Durrham. I bashkohet ushtrisë amerikane gjatë luftës II Botërore dhe shkon me mision në Francë. Me mbarimin e luftës kthehet në SHBA, ku kërkon të thellojë studimet në Paris. Kërkesa i miratohet nga Departamenti i Shtetit dhe Ziso, ose Zisi Vangjeli kthehet në Paris ku ndjek Doktoraturën në Letërsi. Qëndron në Francë gati 15 vjet i mbështetur financiarisht nga një pension si veteran lufte i SHBA dhe nga mësimet e frëngjishtes.
Kërkesa e vazhdueshme për riatdhesim i plotësohet në vitin 1962. Sapo shkel në Shqipëri, shihet si i dyshimtë dhe nis të survejohet nga Sigurimi i Shtetit. Kërkesa për punë si mësues në Tiranë ose Korçë nuk i plotësohet dhe Ziso Vangjeli mbetet në Përmet, ku jetonte në hotel, i vetëm. Ndjekja e vazhdueshme, përfundon me arrestimin e tij në vitin 1968. Akuzohej si agjent francez dhe për agjitacion e propagandë. Pa asnjë provë për veprimtarinë e tij agjenturore, me dëshmitë e spiunëve për deklaratat e tij kundër politikave të Partisë së Punës dhe me provat e poezive me frymë reaksionare, dënohet me 20 vjet burg. Kryen rreth 18 vjet. Pasi del nga burgu, shkon të banojë në Shtëpinë e të Moshuarve në Gjirokastër, ku vihet sërish në përpunim nga Sigurimi i Shtetit.
Jetoi deri në rrëzimin e sistemit si i survejuar.