| Gani Demiri Ratkoceri | |
|---|---|
 |
|
| Informacione Personale | |
| Emër/Mbiemër: | Gani Demiri Ratkoceri |
| Gjyqi | |
| Data e Arrestimit: | 10/2/1978 |
| Dënimi: | 9 vjet Burg |
| Gjykatësi: | Petrit Serjani |
| Data e Lirimit: | 12/5/1983 |
Gani Ratkoceri, i cili përdorte mbiemrin Demiri, ishte mësues nga Kosova. Në vitin 1951, arratiset nga Jugosllavia në Shqipëri, ku u dorëzua në postën kufitare. Pas një muaji, e emëruan mësues në Berat, ku filloi punë, si vullnetar, në fshatin e Drobonikut. Në ‘52-‘53 kryen maturën në Elbasan pasi nuk e kishte mbaruar në Kosovë. Në vitin 1954 i del e drejta e studimit në Institutin e Lartë Pedagogjik, dega Gjuhë-Letërsi. U emërua mësues në Tiranë.
Gani Ratkoceri i kishte shkruar letër Mehmet Shehut mbi disa çështje të arsimimit të të rinjve kosovarë në Shqipëri, për mënyrën si trajtohej historia e Kosovës në Institutin e Letërsisë dhe Historisë, mungesën e plotë të shkrimeve për Kosovën dhe artit kosovar në mediat e Shqipërisë. Ai u ngarkua nga ministri i Arsimit, Manush Myftiu, për të mbledhur emrat e të rinjve kosovarë që dëshironin të vazhdonin studimet e larta në Shqipëri. Në vitin 1962, shkroi një artikull për Hasan Prishtinën. Ai, bashkë me profesorë të njohur nga Kosova, i kishte kushtuar disa vite studimi, personalitetit të Hasan Prishtinës, i cili trajtohej si tradhtar në historinë e Shqipërisë.
Pas 17 vitesh, doli vullnetar të shkonte në Mirditë, por regjimi e trajtoi si të internuar, për të gjetur dëshmitarë për ta dënuar, pasi i kishin dështuar planet për ta arrestuar në Tiranë. Në vitin 1978 dënohet si irredentist. Meqë nuk kishte nen për irredentizëm, e dënojnë për agjitacion dhe propagandë me urdhër të UDB-së jugosllave, me 9 vjet burg. Nuk e pranon akuzën dhe bën disa ankesa për t'iu njohur pafajësia.
E kreu dënimin në burgun e Tiranës dhe më pas në Ballsh, nga ka shkruar dy letra ku akuzonte Sigurimin dhe operativët për trajtimin e kosovarëve, të njerëzve të pafajshëm dhe ridënimet. Më pas e çojnë në burgun e Spaçit, nga shkruan sërish letër për ministrin e ri të Brendshëm, Hekuran Isai, pas arrestimit të Kadri Hazbiut dhe pas kësaj letre ku kërkonte pafajësinë, falet me dekret të posaçëm më 12 maj 1983. Në dhjetor 1984 merr pafajësinë.