| Natan Shakter | |
|---|---|
 |
|
| Informacione Personale | |
| Emër/Mbiemër: | Natan Shakter |
| Atësia: | Leiv |
| Vendlindja: | Sadagura, Ukrainë, në atë kohë në Austri |
| Vendbanimi: | Tiranë3 |
| Datëlindja: | 4/4/1913 |
| Profesioni: | Mjek |
| Datë Vdekja: | 30/6/1973 |
| Rrethanat e Vdekjes: | Hetuesi |
Natan (emri i babait figuron si Leiv ose Leon) Shakter (mbiemri gjendet edhe si Schachner) u lind më 4.4.1913 në Sadagura të Ukrainës, në kohën kur ajo ishte tokë e Austrisë.
Rridhte nga një familje me origjinë tregtare të mesme. Familja e tij në Luftën e Parë Botërore u shpërngul në Vjenë. Pas mbarimit të luftës, kreu në Rumani studimet në liceun klasik. Në vitet 1939-1940, ndoqi studimet e larta për mjekësi në Bolonja, por duke u përndjekur si hebre. Në vitet 1940-1941 u internua në Lazareviç të Jugosllavisë. Pasi gjermanët pushtuan Jugosllavinë, u largua dhe në vitet 1941-1942, punoi kamerier në Prishtinë. Në vitet 1942-1943, punoi hamall në një depo barnash në Tiranë. Në vitet 1943-1944, punoi si mjek pa rrogë në Zall-Herr pranë Xhemal Herrit. Pas vrasjes së këtij të fundit, u përfshi në Tujan në Brigadën e 1-rë partizane. Deri në vitin 1951, qëndroi si mjek në ushtri. Në vitet 1951-1954, punoi si mjek në Burrel, e më pas në vitet 1954-1960, mjek në Fushë-Krujë. Nga viti 1960, punonte mjek në spitalin e Durrësit. Pasi në vitin 1955 u martua me Mila Çoratin, mori edhe shtetësinë shqiptare. Në vitin 1958, kreu kursin dermovenerian në Tiranë. Prej vitit 1948 ishte nën syrin e Sigurimit të Shtetit si “agjent i mundshëm i zbulimit gjerman”. Më 10.1.1973 u arrestua në Durrës, i akuzuar për agjitacion e propagandë në bazë të nenit 73/1 të Kodit Penal.
Gjatë hetimit “u zbulua” se ishte vënë në shërbim edhe të shërbimit sekret italian nga viti 1942. Për ta plotësuar si “poliagjent” i shtuan edhe rekrutimin nga zbulimi sovjetik në vitin 1956. Nga torturat e rënda dhe gjendja e paduruar psikologjike, më 17.5.1973 u dërgua për ekspertim në pavijonin nr.7 të Repartit nr.313 Tiranë (spitali i burgut). Më 28.6.1973, doli i përgjegjshëm nga spitali dhe u dërgua në paraburgim në Durrës. Nga këto rrethana të jashtëzakonshme, doktor Natani u vetëvar në qelinë e paraburgimit në Durrës më 30.6.1973 në moshën 60-vjeçare, duke përshtatur rrobat e trupit si litar.
Sipas disa burimeve, ka dëshmitarë që thonë se ai kishte ndërruar jetë në tortura dhe më pas ishte varur nga personeli që krimi të servirej si vetëvrasje.