Enciklika e Papa Piu XI e vitit 1936/ "Distancim nga kjo doktrinë, e cila nuk njeh familjen, kundërshton besimin dhe nxit amoralitetin"
Një material me disa pika, do të mbërrinte nga Vatikani për klerin katolik shqiptar, në vitin 1936. Ishte Enciklika e Papa Piu XI, ku renditeshin disa pika të rëndësishme që paralajmëronin se çfarë është komunizmi e se si besimtarët katolikë shqiptar duhet të qëndronin larg kësaj doktrine, e cila sipas Vatikanit, ishte një paralajmërim për rrezikun e që do të sillte komunizmi në Shqipëri. Materiali gjendet në dosjen e Sigurimit të Shtetit, për klerin në Shqipëri, hartuar në vitin 1979. Kujto.al publikon sot tekstin e kësaj enciklike, marrë nga dosja e klerit, pranë AIDSSH-së. Enciklika është një ndër materialet që Sigurimi i Shtetit i përdori si provë për të pushkatuar dhjetëra klerikë e për të burgusur qindra të tjerë.
Përmbajtja e Enciklikës së vitit 1936
Në vitin 1936, Papa Piu XI nxjerr enciklikën e tij, me qëllim për të luftuar komunizmin. Një kopje e enciklikës është sjellë në Shqipëri me anë të delegatit Apostolik Monsinjior Anton Niutit. Materiali i përkthyer në shqip, përhapet në të gjithë klerin katolik. Përmbatja e Enciklikës është si më poshtë:
1- Komunistët janë kundër fesë, mbysin meshtarët, mbyllin kishat dhe pengojnë lutjet fetare.
2- Komunistët janë kundër martesës me kunorë, ata njohin një bashkim civil derisa atyre u pëlqen të bashkëjetojnë.
3- Komunistët, në martesë, nuk marrin për bazë gjakun dhe gjininë.
4- Komunistët nuk njohin familjen. Komunistët mendojnë se pa u rritur mirë fëmija, ia dorëzojnë shtetit dhe shteti e rrit fëmijën në vende të caktuara, për të mos njohur dashurinë për familjen.
5- Komunistët i shtyjnë të rinjtë drejt prishjes së moralit.
6- Komunistët kërkojnë që njerëzit të punojnë për shtetin e jo shteti për ta. Duan që njerëzit të punojnë shumë dhe të mos shpërblehen për punën e tyre.
7- Cilido katolik që do të marrë pjesë në Partinë Komuniste, duhet të nxirret nga Kisha dhe t'i ndalohet sakramenti.