Riza Alizoti u la i varur në litar për dy ditë pranë disa rrepeve në Kuçovë, me qëllim që të ngjallte terror tek punëtorët dhe drejtuesit e ndërrmarrjes së nxjerrjes së naftës
74 vite më parë, si sot më 27 shtator nisi gjyqi komunist ndaj "Grupit të deputetëve". Gjyqi u zhvillua në sallën e kinemasë “17 Nëntori”. Njëri prej pjesëtarëve të quajtur grup armiqësor, ishte edhe inxhinieri i naftës Riza Alizoti.
Ishte vetëm 36 vjeç kur u thirr nga zyrtarët e lartë të kohës dhe i vendosën një dekoratë në qafë, pasi kishte vënë në punë dy puse të rëndësishme të naftës, bashkë me kolegët e tij. Por tre muaj pasi e kishin dekoruar për punë të mirë, e vendosën në litar dhe e mbajtën për dy ditë të varur, si armik i popullit. Kjo ngjarje makabre ndodhi në vitin 1947, kur Riza Alizoti u dërgua me pranga në duar bashkë me të tjerë në procesin që njihet si “Gjyqi i deputetëve”.
Në vitin 1945 Riza Alizotit regjimi i kishte vrarë babanë, personalitetin e njohur të politikës Fejzi Alizotin, edhe ai në një proces të stisur, të njohur si “Gjyqi special”. I ndodhur në rrethana të tilla, Riza Alizoti bashkë me inxhinierët italianë vunë në punë puse nafte në Kuçovë dhe ringritën një ndërrmarrje thuajse të shkatërruar. Me brengën për humbjen e të atit, i riu që kishte një “sënduk” të madh me diploma dhe specializime pasuniversitare uli kokën duke dhënë kontributin e madh për shkak të ekspertizës në një nga sektorët e rëndësishëm të ekonomisë së kohës. Riza Alizoti kreu Kolegjin Robert në Stamboll, vazhdoi Tekniken e Fultzit në Tiranë dhe studimet e larta në Oksford, specializohet për shfrytëzimin e minierave në Strasburg dhe më pas u kthye për të dhënë kontribut në vendin e tij. Por nuk e lanë.
Procesi i njohur si “Gjyqi i deputetëve” u zhvillua në 27 shtator 1947 në sallën e kinemasë “17 Nëntori”. Këshilli i Gjykatës së Lartë Ushtarake, i përbërë nga Major Niko Ceta Kryetar, Kapiteni I Nexhat Hyseni anëtar, dhe Kapiteni i II-Mustafa Iljazi anëtar, shpallën vendimin e dënimit të grupit të deputetëve të Legjislacionit të Parë të zgjedhur në vitin 1945, mes shumë personaliteteve dënoi me vdekje, me varje edhe inxhinierin 36-vjeçar Riza Alizoti. Në mënyrë demonstrative ai u var pranë disa rrepeve në Kuçovë dhe u mbajt për dy ditë i pajetë në litar, me qëllim që të ngjallte terror te punëtorët dhe drejtuesit e ndërrmarrjes së nxjerrjes së naftës.