Radiogrami i Ndreko Rinos: “Populli armët i jep me zor, duke i rrahur. Komunat ku operojnë forcat tona janë tmerruar…”
Aksioni i përgjakshëm i komunistëve në veri, nën udhëheqjen e Mehmet Shehut dhe direktivave te Enver Hoxhes nga Tirana, kishte arritur kulmin në mes të shkurtit 1945.
Në një radiogram dërguar Mehmet Shehut si komandant i operacionit nga Ndreko Rino, i cili në këtë kohë drejtonte operacionin në Shalë dhe Shllak njoftohen detaje se si dhunohej populli i thjeshtë me pretekstin e mbledhjes së armëve.
Komunistët siç theksohet edhe në këtë dokument e mbështesnin suksesin e tyre në terrorin që ata ushtronin. Duke kryer krime të përbindshme në familjet e pafajshme në veri të vendit, ata impononin me forcën e armëve, rrahjeve e djegjeve të shtëpive, se regjimi komunist do t'i nënshtronte me çdo kusht të gjithë ata që nuk e donin dhe pranonin komunizmin.
Në këtë radiogram të 17 shkurtit 1945 Ndreko Rino shkruan:
Nr.3
Dt.17/II/45
Komandantit të operacionit
Vazhdon operacioni në komunën e Shalës e të Shllakut. Me forcat që operojnë në Shllak nuk kemi lidhje të ngushta. Stop. Pse janë larg. Ka filluar çarmatimi. Populli armët i jep me zor, duke i rrahur. Profesori ka filluar të marri lidhje me Bajraktarin e Shalës. Na lajmëroni se do të thërrasim edhe Bajraktarin e Shoshit. Komunat ku operojnë forcat tona janë tmerruar prej operacionit dhe patjetër do të dali me sukses.
Major Ndreko Rino.